جات الحملة
////
جات الحملة
وجابت معها
لعواد
والواد الهواد
لي في الارض
راه ديالو
ولي في سما
عين عليها تنقاد
تهبط مع الحملة
وجنابو عمرت
تراب وغيس
طمي الزمان
لي جيرانو
فاهمين قيمتو
وعارفين غلتو
الواد راه في
بلاصتو واد
ورا فيه
الما دايز
او مايبدل
بلاصتو
طال الزمان
ولا قصار
وخريرو قصة
شايب وعكاز
أدوز على الهرهوري
لا دوز على السكوتي
راه شلا ماكين
في الواد
او متلقاهش في
البحر
ضاية الواد
ساكتة
عومة لمسن
عيونو مدفݣة
من تحت السمار
والدفلة
وعيقين مزيان
يتحناو مع الحملة
عا يدوز
ويرجعو لبلاصتهم
كيف لخروف
المدزوز
طلحات الواد
شوك بيض مدادي
يزهر في
كانون الصياد
الدومة شرك
وشبكة
غازها دوى
معلوم عند
صحاب لقلم
ودواية
نخلاتو بلوح
وثمر صالو
او جالو وفاتو
لبحر
وراه نفاع جنابو
كلها خضرا ونعناع
الواد يا الواد
درس في الحياة
وعبرة للاسياد
وقصة محبوكة
من الاجداد للاجداد
وشكون يفهمك يا واد
حتى جات الحملة
وجابت معها الاعواد..
حامد رميقي / الݣارة
